LAOAG CITY – Umabot iti 15 ribo a pisos ti balor dagiti nadadael iti pannakauram ti maysa a pick-up ford iti Batac-Banna Road, bisinidad ti Barangay 29, San Pedro iti ciudad ti Batac.
Daytoy ti inbatad ni Fire Senior Inspector Roxanne Parado, ti Acting Provincial Director ti BFP ditoy probinsya.
Binigbig ni Parado ti agtagikua iti nauram a pick-up a ni Mar Viandreus Ruiz Y Ibuyat, addaan iti umno a tawen ken residente iti ciudad ti Batac.
Inbatad na a basar iti driver ni Ruiz, aggapo da iti ili ti Banna ken kabayatan ti panagawid da iti ciudad ti Batac ket bigla lattan a nagasok iti sango a paset ti lugan agingga a nauram.
Innayon ti driver ni Ruiz a saan a naiplastar a naimbag ti terminal ti baterya nga isu ti patien na a nangitunda ti napasamak nga uram.
Nupay kasta, agtultuloy latta ti naiget nga imbestigasyon ti BFP tapno maamoan no ania ti pudno a nakauraman ti nasao a lugan.
