LAOAG CITY – Maysa a Pinay idiay Hawaii ti nabiktima iti ‘Scam na Pag-ibig’ babaen iti maysa a nagpabigbig nga European.
Segun ken ni Bombo International Correspondent Manny Pascua idiay Hawaii, naam-ammo ti saanen a nainaganan a Pinay a taga Ilocos Norte ti nagpabigbig nga European iti social media agingga a naaddaan da ti relasyon uray saan da pay a nagkita iti personal.
Iti naukkon nga impormasyon ni Pascua, inbaga ti nagpabigbig nga European a mapanna danunen ti pinay idiay Hawaii ngem umuna pay laeng nga umay na bisitaen dagiti nagannak ti babae ditoy Pilipinas.
Nupay kasta, timmawag ti lalaki iti pinay ken inpakaammo na a tiniliw dagiti otoridad iti Ninoy Aquino International Airport (NAIA) gapu ta dakkel unay ti iggem na a kwarta isut gapuna a kiniddaw na a mangipatulod iti 5 ribo a dolyar.
Inbatad ni Pascua a nangiremedyo ti pinay ken dagus na nga inpatulod, ngem kalpasan a naipatulod na ti kwarta ket saannan a nakontak ti nasao a lalaki.
Innayon ni Pascua nga immunan a binalakadan ti pagayam na ti nasao a pinay a saanna a patuludan ti kwarta ngem saan nga inkaso ti maseknan.
