LAOAG CITY – Natay ti maysa a police officer iti napasamak a pammaltog iti UPMC Memorial Hospital iti York County, Pennsylvania.
Malaksid iti daytoy, adda pay ti lima nga indibidual a nasugatan, pakairamanan dagiti sibilyan, dua a police officer ken maysa a nurse.
Basar iti report, awan met dagiti pasyente a nasaktan iti insidente.
Naamoan a napatay met dagiti otoridad ti suspek a ni Diogenes Archangel Ortiz, agtawen ti 49.
Mainaig iti daytoy, inrakurak ni District Attorney Tim Barker nga agpapan ita ket saan pay nga inpublikar dagiti imbestigador no ania ti motibo ti pammaltog, ngem segun kenkuana ket ti puntirya ti insidente ket iti ICU wenno Intensive Care Unit gapu ta iti laeng napalabas a lawas ket nakikoordinar ti suspek iti ospital para iti maisayangkat a medical procedure nga adda ti pakainaigan ti sabali a tao.
Kabayatanna, nabigbig met ti pimmusay a police officer a ni Andrew Duarte a lima a tawenen nga agserserbi iti Denver Police Department a nakaalaan na kadagiti pammadayaw kas ti Mothers Against Drunk Driving (MADD) Hero Award gapu iti naiget a panangipatungpal na ti linteg kontra kadagiti agmanmaneho a nabartek wenno adda impluwensya na ti nasanger.
Iti agdama, naiget ti panagbantay dagiti otoridad iti nadakamat nga ospital.
