LAOAG CITY – Saan a 100 a porsiento nga umanamong ni Mr. Karl Lenin Benigno, maysa a political Analyst iti rakurak ni dati a Senate President ken Defense Minister Juan Ponce Enrile a saan a kontraen ti China seknan iti West Philippine Sea.
Daytoy ket seknan iti rakurak ni Enrile a dakdakkel ti impact na iti Pilipinas no bilang man makapungtot ti China gapo iti aksyon ti pagilyan.
Segun kenni Benigno, masapol nga agresibo ngem “calculated” ti addang ti gobierno ti Pilipinas.
Inlawlawag na a masapol nga agresibo no sadinno a makita ti agpada a pagilyan nga adda ti karbengan ti Pilipinas iti exclusive economic zone.
Nupay kasta, nasken nga agannad ti gobierno iti addang wenno estratehiya bayat ti panangipetteng ti Pilipinas iti daytoy a banag.
Inbatad na nga ado met dagiti estratehiya a mabalin nga aramiden ti gobierno kas iti agtutuloy a presensya ti floating asset ken ti BFAR ken coastguard, ken ti panangipila ti diplomatic protest.
Kuna ni Benigno a dakkel a makaapektar iti desisyon ni Presidente Rodrigo Duterte iti foreign policy iti panagidonar ti China ti ado a bakuna gapo ta maip-ipit ti presidente.
Ibilang na met a napintas daytoy nga estratehiya ti China nga isu ti manglimitar met iti garaw wenno desisyon ti gobierno.
Mainaig iti daytoy, masapol latta nga agyaman iti China gapo iti tulong na ngem rumbeng kuma a saan a gundawayan daytoy ti Tsina.
