LAOAG CITY – Nakaalerto dagiti units ti Philippine National Police (PNP) iti posible a tignay protesta ken dadduma pay nga aktibidad mainaig iti panangrugi ti impeachment court proceedings ti Senado.
Inbatad ni Philippine National Police Chief General Jose Melencio Nartatez Jr., nakasaganan ti puersa ti pulisia tapno siguradoen nga amin a maisayangkat nga aktibidad ti nagduduma a grupo manipud iti agsinnungbangir a partido ti pulitika ket agtalinaed a nakappia.
Karaman iti pinaigetan ti deployment dagiti pulis iti aglawlaw ti Senado ken dadduma pay a convergence points iti intero a pagilian.
Nadakamat nga immunan a kinumpirmaran ti Senado nga agtitipon dagiti Senador iti impeachment court maiyataday iti pagannurotan.
Mainaig iti daytoy, kuna ni Nartatez kadagiti mangiwayat ti tignay protesta, maawatan ti nailian a pulisia ti sentimiento ti kaadoan maipapan iti nasao a banag.
