LAOAG CITY – Inaprubaran ti Senado iti maika-dua a panagbasa dagiti dua a rakurak a linteg ni Sen. Francis “Chiz” Escudero a mangbigbig ken ipaayan ti proteksion dagiti line workers ditoy pagilian.
Iti salinong ti rakurak a Senate Bill No. 2484, maideklarar ti umuna a Lunes ti Agosto iti tunggal tawen kas National Line Workers Appreciation Day.
Kalikagumna daytoy a gakat tapno bigbigen ti rigat dagiti line worker iti electrification efforts iti tunggal makapasar ti pagilian dagiti nagduduma a didigra.
Kabayatanna, iti met maika-dua a rakurak a Senate Bill No. 2485: Line Workers Insurance and Benefits Act, kalikagumna met daytoy a maipaayan ti mandatory insurance dagiti line worker a saan a bumaba iti P300,000 no adda ti saan a nasayaat a mapasamak kadakuada.
Mainaig iti daytoy, inpetteng ni Escudero dagiti sakripisio dagiti line worker a masansan a nakapusta ti seguridadda tapno laeng mapagtalinaed a naraniag dagiti pagtaengan ken ti telecommunication system ti pagilian.
