LAOAG CITY – Inaprubaranen ti Senado iti maikadua a pannakaibasa ti Senate Bill No. 2426 wenno Comprehensive School Safety Act, ita nga aldaw, Setiembre 15 a gagemna a mangipatungpal ti maysa nga nasional a sistema tapno mapapigsa ti seguridad ken proteksion dagiti estudiante ken school personnel.
Iti babaen ti daytoy, buklen ti maysa a National Comprehensive School Safety Framework a nakasentro iti tallo a kangrunaan nga addang, prevention, response ken recovery.
Pakairamanan idtoy ti panangtunton kadagiti posible a risgo iti pagadalan, panagsanay kadagiti mangisursuro, nagannak ken student leaders, pannakaadda ti nalawag nga emergency protocols, communication systems ken regular a safety drills.
Naikeddeng pay ti pannakaipaay ti psychosocial support ken trauma-informed care kadagiti estudiante, mangisursuro ken personnel a maapektaran dagiti insidente ti kinaranggas wenno dadduma pay nga emergency.
