LAOAG CITY – Mairekreklamo ti kaado ti ngilaw iti iti Barangay Mumulaan iti ili ti Paoay ken ti maitudtudo a naggapoan dagitoy ket iti poultry a kukua ni Mr. Michael Tacderan.
Segun met kenni Tacderan, kanayon nga isuna ti maitudtudo no problema ti ngilaw gapo ta isuna ti maysa kadagiti ummuna a naaddaan ti pagtaraknan ti manok.
Inbatad na nga uray kanayon nga isu ti maitudo a rason ti kaado ti ngilaw uray saan a pudno daytoy ket mangipaay latta ti tulong kas iti pannaibunong ti agas a mangkontra iti daytoy ken ag-spray da tapno matay dagiti ngilaw.
Inlawlawag na a no iti poultry na ti paggapoan dagiti ngilaw ket “baby flies” kas iisu ti naobserbaran da ngem dagiti ngilaw a mairekreklamo ita a gundaway ket dadakkel.
Mainaig iti daytoy, kunana nga idi damo a maireklamo ti poultry na ket naginspek ti Provincial Veterinary Office ken napaneknekan met a saan nga isuna ti naggapoan ti ado a ngilaw.
Inpetteng na a naipaayan pay isuna ti sertipikasyon seknan iti “Zero Flies” ken “No Bad Odor”.
Patien na a saan a nagliway iti panangmentenar ti kinadalos ti poultry na ken ikarkarigatan na a solusyonan ti problema.
Kabayatanna, kalikagom ni Tacderan nga agtataripnong dagiti amin nga agtagikua iti poultry uray maminsan laeng iti makabulan tapno magun-od ti “Zero Flies” kadagiti poultry iti ili ti Paoay.
