LAOAG CITY – Kinettel ti maysa a promodiser ti bukudna a biag gapu iti maipagarup a depresyon.
Segun ken ni P/Capt. Rudy James Jacalne, Deputy Chief of Police ti Laoag City Police Station, ti biktima ket agtawen ti 45, naasawaan ken residente ditoy siudad ti Laoag.
Inbatadna a nakita dagiti karruba ti biktima a nakabitin daytoyen iti paset ti Padsan River nga awanen ti biagna.
Inlawlawagna a basar iti inwayatda nga imbestigasion, sakbay ti napasamak nga insidente ket saanen a maun-uni ti biktima ken arig nauneg ti panpanunotenna.
Kunana a saan met nga inpagarup ti pamilia ti biktima nga aramidenna daytoy a banag.
Mainaig iti daytoy, inpakaammo ni P/Capt. Jacalne nga awan ti foul play iti napasamak nga insidente.
Innayonna a nagkedked metten ti maseknan a pamilia a dumalan iti autopsy ti bangkay ti kabagianda.
