LAOAG CITY – Kinumpirmaran ni PCapt. Chris Anthony Sorsano, ti hepe ti PNP-Solsona a maysa a lalaki nga agtawen ti 26 iti nasao nga ili ti pimmusay kalpasan a nagbekkel.
Inbatad na a basar iti naiyuswat nga imbestigasyon, maipagarup a makapaspasar ti depresyon ti biktima.
Kuna na a daytoy ket gapu iti panagturong ti asawa na iti Jeddah tapno agpaay kas OFW.
Segun ken ni Sorsano, maipagarup a ti kayat ti lalaki ket ti kanayun a makitkita ken makasarsarita iti telepono ti asawana, banag a saan a kanayun a mapatgan daytoy gapu iti trabahona idiay Jeddah.
Inlawlawag ti hepe a posible a daytoy ti rason ti depresyon ti biktima ken isu metten ti puon ti panangkettel na iti bukod na a biag.
Immunan nga inpakaamo ni Sorsano a maysa a concerned citizen ti nangipadanon ti report nu sadino nga idi napanda nagreposponde ket nalamiisen a bangkay ti biktima.
