LAOAG CITY – Pimmusay ti maysa a lalaki kalpasan ti napasamak a desgrasya iti paset ti Barangay Davila iti ili ti Pasuquin.
Nabigbig ti biktima a ni Mr. John Reymark Aguinaldo y Lizardo, agtawen ti 21, ken residente iti Barangay Capurictan iti ili ti Solsona.
Iti imbestigasyon dagiti otoridad iti nasao nga ili, ti biktima ket agpapaabagatan a direksyon iti national highway ken idi adda iti kurbaan a paset ti kalsada ket nagderderetso.
Gapo iti daytoy, nadungpar ni Aguinaldo ti konkreto nga alad nga adda iti akin-laud a shoulder ti kalsada.
Segun met kenni Police Master Sergeant Joey Pajinag, imbestigador ti nasao a desgrasya, ti biktima ket maysa a rider ken naggapo isuna iti ili ti Burgos.
Inbatad met ti uliteg ti biktima a kalpasan ti panag-rides dagitoy ken ti kagrupo na ket naggi-inom da ken agawid kuman idi napasamak ti desgrasya ken rumrumwar a napaspas ti panagpataray na.
