LAOAG CITY – Maysa a tourist attraction idiay China ti nakaawat ti Guinness World Record title gapu ta isu ti kadakkelan nga ice and snow theme park iti intero a lubong.
Nabiit pay a pinasingkedan ti Guinness World Records a ti Harbin Ice ken Snow World ti addaan iti titulo a “Largest Temporary Ice and Snow Theme Park.”
Immuna a nalukatan iti publiko idi 1999, ti Harbin Ice and Snow World ket nagbalinen a tinawen a makaawis iti tunggal panawen ti kalam-ekna idiay Heilongjiang.
Daydaywen daytoy dagiti domestic and international tourists a kalikagumda a padasen ti niebe ken makakita kadagiti eskultura iti yelo. Bayat nga umad-adu ti umay ditoy, tinawen met a dumakdakkel ti lugar a saklawen ti theme park.
Ti 25th Harbin Ice and Snow World ket agdama nga addaan iti kadakkel a 8,790,697.3 a kadapan kuadrado wenno 81 nga ektaria.
Adda 2,000 nga eskultura ditoy a naaramid iti yelo ken niebe. Maysa kadagiti pagpannakkel ti theme park ket kabaelanda ti mangipaay iti panggedan iti nasurok a 10,000 a trabahador a mangbusbos iti makabulan a mangparnuay kadagiti eskultura iti yelo.
Naglukat ti Harbin Ice and Snow World idi Disiembre 18, 2023 ken nagserra idi Marso 1, 2024.
