LAOAG CITY – Balligi a naarestar ti maysa a tricycle driver babaen iti naisayangkat nga Anti-Illegal Drug Buy-Bust Operation iti bakante a lote iti likodan ti National Food Authority iti Brgy. 2 ditoy siudad ti Laoag.
Basar kadagiti otoridad ti subject ket ni Jonathan Jaramilla, adda iti umno a tawen, maysa a tricycle driver, residente iti Brgy. 7-A ditoy siudad ken maibalang a Street Level Individual.
Nakumpiskar manipud iti suspek ti 2 a heat sealed transparent plastic sachet, 2 a P1,000 bill a nausar kas buy-bust money.
Segun iti subject, adda ti naglugan kaniana a babai manipud iti sanguanan ti kapitolyo probinsial nga agturong iti laud a paset ti National Food Authority office a masarakan iti Brgy. 2 ditoy siudad.
Kinunana nga apaman a makadanon iti nadakamat a lugar ket inbatad ti pasahero na nga adda ti eskinita a pagturungan ti tricycle.
Mainaig iti daytoy, kuna ti subject nga apaman a makadanon da iti nasao nga eskinita ket maipagarup nga adda ti tallo a lalaki a kellaat a nangkemmeg kenkuana idinto a maipagrup nga adda ti naipabulsa kenkuana a kontrabando.
Nupay kasta, naiget a naglikudan ti subject a saanna a kukua dagiti maipapati nga illegal a droga a nakumpiskar manipud kenkuana.
Inadmitir met ti suspek a dati a natiliw daytoyen gapu iti panagusarna iti illegal a droga.
Inpasingkedna a nabayagen a nagsardeng daytoyen nga agusar iti illegal a droga ken saan daytoy nga aglaklako.
Kabayatanna, inbatad ti Philippine National Police ditoy siudad ti Laoag a anabayagen a monmonitoren da ti subject ken binnallaagan da daytoy nga isardeng nan ti maipagarup a panaglako ti illegal a droga.
Iti agdama, nagtalinaed ti subject iti kuerpo ti polisia ken manamnama a mapilaan ti kaso a panaglabsing iti Republic Act 9165 wenno Comprehensive Dangerous Drugs Act of 2002.
