LAOAG CITY – Natay ti maysa a lalaki bayat a maag-agasan iti Gov. Roque Ablan Senior Memorial Hospital kalpasan ti napasamak a desgrasya iti crossing ti Panganiban St, ken Gomburza St, bisinidad ti Barangay 7-B ditoy ciudad ti Laoag.
Nabigbig daytoy a ni Jessie Mariano Lorenzo, 50, naasawaan, maysa a tricycle driver ken residente iti Barangay 1 ditoy ciudad ti Laoag.
Iti imbestigasyon, agpaamyanan a direksyon iti Panganiban St. ni Lorenzo ken ti pasahero na a ni Roger Galarce Ruadap, 57, residente iti Barangay 55-C ditoy ciudad idi aksidente nakadinnungpar na ti Toyota Fortuner nga inturong ni Marlon Condraco Rosal, 53, residente iti Barangay 32-C ditoy ciudad kadwa na ni Larry Patoc Asuncion nga agpalaud met a direksyon iti Gomburza St.
Dagus a naitaray iti ospital ti biktima a nagsagaba ti sugat iti ulo ngem indeklara ni Dr. Ricarte Caday a pimmusay.
Kabayatanna, maisagsaganan ti kaso a maipila kontra ken Rosal ken nagtalinaed iti kustudiyar ti PNP-Laoag.
