LAOAG CITY – Nasabat ti Philippine National Police iti ili ti Paoay ti maysa a truck nga adda ti karga na iti nagduduma a furnitures a naaramid iti mahogany.
Basar kadagiti otoridad, awan ti maipakita ti driver a ni Randy De Vera, manipud iti Pangasinan, dagiti naan-anay a dokumento para iti kargana.
Mainaig iti daytoy, adda ti dua a menor de edad a pasaherona nga agtawen iti 10 ken 5.
Gapu iti daytoy, dagus nga inpakaammo ti Philippine National Police iti ili ti Paoay iti biang ti Department of Environment and Natural Resources tapno maimbestigaran ken makumpirmaran dagiti dokumento.
Naammoan a mai-deliver koma dagiti furnitures iti ili ti Pasuquin.
Nupay kasta, bayat ti panagur-uray ti verification manipud iti Department of Environment and Natural Resources ket temporario a naipasidong ti driver ken dagiti kargada iti kuerpo ti Philippine National Police iti nadakamat nga ili.
Kabayatanna, manamnamma a mapilaan ti reklamo ti driver gapu iti panagsalungasing na iti Presidential Decree 705 wenno iti Forestry Reform Code ti Pilipinas.
