LAOAG CITY – Naiget a naglikudan ni Barangay Chairman Narciso Oriente iti Barangay Francisco iti ili ti Dingras ti alegasyon kenkuana nga aglaklako ti semento a naggapo iti municipyo.
Segun kenni Oriente, gapo iti alegasyon ket arig na nagbalinen nga agtatakaw.
Kalikagom ni Oriente a kasango na iti personal ti nangireklamo tapno makapagsarita da iti nasayaat ken tapno malawlawagan.
Inpetteng na a no adda man ti laok na a pulitika daytoy ket rumbeng kuma a saan a maipasa kenkuana.
Inbatad na a kas kapitan ket kalikagom na a maiyemplementar amin dagiti proyekto para iti pagdur-asan ti barangay da.
Naamoan a ti pakaipatungpalan dagiti semento ket ti farm to market road ken makawalas pay laeng nga adda iti nasao a barangay.
Kabayatanna, nakumpirmaran ti Bombo Radyo nga awan ti kurang iti 125 a bags ti semento a naawat ti nasao a barangay.
