LAOAG CITY – Nagpakamatay ti maysa a baro iti Bgy. 55-B Salet iti ciudad ti laoag babaen iti panagbekkel na.
Nabigbig ti biktima a ni Edilmark Masaoay Lozano, agtawen iti 20, awanan asawa, maysa a contruction worker ken residente iti Sitio Bulangon iti nasao a barangay.
Mismo a ti ama ti biktima a ni Efren Parado Lozano ti nakadiskubre nga awananen ti biag ken nakabitin iti puon ti saba ti anak na a ti inusar na a nagbekkel ket nagango a bulong ti saba ken kayo ti bayawas iti abay na.
Gapu ti daytoy, nangiwayat ti inspeksyon dagiti otoridad iti nakapasamakan ti maipagarup a nagpakamatayan na ket nadiskubre da nga adda pay ti nakita da a sanga ti bayawas iti agarup 2 ingganat 3 a metro ti kaadayuna manipud iti nakakitaan ti bangkay.
Segun kenni Dr. Lynette Formantes iti Laoag City Health Office, nangiwayat iti postmortem examination iti bangkay ti biktima a ti rason a pimmusayan na ket gapu iti asphysia secondary to hanging ken addan agarup 9 nga oras a natay kasanguanan a nabirukan ti ama na a maysan a bangkay.
Saan met pay nga ammo no ania ti makagapu iti nagpakamatayan na.
Agtultuloy pay laeng ti imbestigasyon iti nasao a pasamak.
