LAOAG CITY – Natiliw ti maysa a baro kalpasan a nagtakaw iti banbantayan na a balay iti Barangay 48-A, Cabungaan ditoy ciudad ti Laoag.
Nabigbig ti suspek a ni Rod Christoper Ramos, agtawen ti 18 taga Barangay 32-A, Lapaz idinto a ti agtagikua ti balay ket ni Andres Tungpalan, agtawen ti 61, DEAN iti Mariano Marcos State University-Currimao Campus.
Karaman kadagiti innala ni Ramos ket ti maysa a samsung note 3 nga agbalor iti 23 a ribo a pisos, monopad nga agbalor ti 2 a ribo a pisos, charger cord nga agbalor ti 300 a pisos ken ti maysa a relo nga agbalor ti 15 a ribo a pisos.
Segun iti report, pinagbantay ni Tungpalan ni Ramos kadwa na ni
Mikaela Czarina Patoc, agtawen ti 18 a taga Barangay Lapaz met laeng bayat ti papanda panagbakasyon.
Nupay kasta, apaman a nakasangpet da Tungpalan ket awanen dagiti nasao a banag iti master bedroom na.
Naamoan a kinomprontar ni Tungpalan ni Patoc ket ditoy nga intudo na ni Ramos a simrek iti kwarto na.
Inadmitir met ni Ramos a daytoy ti nangala kadagiti mapukpukaw iti banbantayan da a balay.
Iti agdama, maisagsaganan dagiti dokumento para iti pannakaipila ti kaso kontra ken ni Ramos.
