LAOAG CITY – Natiliw ti maysa a baro kalpasan a naalaan ti maipagarop nga iligal a droga kabayatan ti naiyuswat a checkpoint idiay Barangay 5, San Vincente iti ili ti Sarrat.
Nabigbig daytoy a ni Mekie Jeuv Juan, agtawen ti 19, awanan ti asawa ken residente iti Barangay Baay idiay ciudad ti Batac.
Immuna iti daytoy, nasada ni Juan iti checkpoint gapo saan a nakasuot ti helmet ken kinddaw da a makita ti lisensya ken OR/CR ti motorsiklo na ngem adda ti nakita da a nakaipit iti cellphone na nga ibulsa na kuma kalpasan a linukatan na ti compartment ti motorsiklo na.
Segun kenni Police Chief Inspector Roldan Suitos, chief of police ti PNP-Sarrat, idi kinapkapan da ket adda pay ti naala a maipagarop a marijuana a nakalukot iti papel ken naikabil iti ziplock, lighter, cellphone, ken lima nga stick ti sigarilyo.
Inbatad ni Suitos a naiget ti panagkedked ni Juan nga agsao isut gapo na a saan da a maamoan no ti iligal a droga ket usaren wenno ilako na, ken no sadinno ti nangalaan na.
Kunana a makikoordenar da iti PNP-Batac tapno madeterminar ti katatao ti suspek.
It agdama ket adda iti PNP-Sarrat ti nasao a suspek.
