LAOAG CITY – Inrakurak ti Malakanyang a nakatutok ni Presidente Ferdinand Marcos Jr. iti trabaho ken saan nga iti panangpulitika iti baet ti agtultuloy a krisis gapu iti gubat iti Middle East.
Inbatad ni Presidential Communications Office Undersecretary ken Palace Press Officer Claire Castro, prioridad ti Presidente ti solusion a mangpalag-an iti epekto ti ngumatngato a presio ti langis ken protektaran dagiti Filipino.
Kabayatanna, tinagabassit ti Malakanyang ti pannakaestablisar ti Reform Alliance for Good Governance and Accountability (RAGE) Coalition, iti panangidaulo ni Davao City Mayor Sebastian Duterte, kagiddan iti panangirakurak ni Castro a saan nga apektado ken saan a madanagan ti administrasion iti daytoy.
Iti report, ti panangirubuat ti Reform Alliance for Good Governance and Accountability Coalition ket naiwayat sakbay ti naikeddeng nga impeachment hearing iti House Committee on Justice inton bigat, Abril 14, no sadinno a manamnama a sumango ni Ramil Madriaga a nangadmitir a maipagarup a dati a “bagman” ni Vice President Sara Duterte.
