LAOAG CITY – Dead on arrival iti Dingras District Hospital ti maysa a construction worker kalpasan a nakuryente idiay Barangay Barong ti nasao nga ili.
Nabigbig daytoy a ni Melvin Llanes y Manuel, agtawen iti 43, addaan ti live-in partner ken residente met laeng ti nasao a barangay.
Segun ti report, napasamak ti insidente bayat nga agikabkabil ti biktima ti metal parring iti kisame ti balay ni Avelino Matulin, kadwa na dagiti pada na met laeng a construction workers a da Dante Llanes, Edgar Mazanillo, Leonard Llanes ken ni Editha Daquioag, agpapada dagitoy a residente ti nasao a barangay.
Naamoan a nakita laengen ni Dante Llanes ti biktima nga agkuykuyegyeg isut gapuna nga inbilin na kadagiti kakadwa da a mapan da ibaba ti circuit breaker.
Kalpasan ti sumagmamano laeng a gundaway ket natennag ti biktima ken intaray da a dagus iti Dingras District Hospital ngem naideklara a dead on arrival.
Kabayatanna, kinumpirmaran ti pamilya ken dagiti katrabahoan ti biktima a masansan nga agsagaba ti high blood pressure ni Melvin Llanes.
