LAOAG CITY – Naipilan ti kaso a theft babaen iti inquest proceeding kontra ken ni John Mark Guevarra, agtawen iti 26, naasawaan ken agkaskasera iti Barangay 1, Sarrat, Ilocos Norte.
Daytoy ti inbatad ni Police Chief Inspector Roldan Suitos, ti chief of police iti ili ti Sarrat.
Immuna ti daytoy, natiliw ni Guevarra kalpasan a nagtakaw iti dua a rim a sigarilyo iti maysa a kooperatiba iti Barangay 1 iti nasao nga ili.
Segun ken ni Suitos, nagusar ti suspek ti nalawa a jacket tapno mailemmeng na ti takawen na iti nasao a kooperatiba.
Nupay kasta, babaen ti tulong ti CCTV camera a nakaimuntar ti nasao a pasdek negosyo ket naduktalan ti panangisabukel ti suspek kadagiti nasao a produkto.
Inpakaammo pay ni Suitos a ti nasao a suspek ti maatap a nagtakaw ti laptop iti maysa a pagadalan iti ili ti Sarrat iti kallabes ngem ibal-validate da paylaeng daytoy a banag.
Kabayatanna, inbatad ni John Mark Guevarra a naaramid na laeng ti nagtakaw iti kooperatiba iti Barangay 1 iti ili a Sarrat gapu ti kinarigat ti panagbiag da.
Iti pannakisarsarita kenkuana ti Bombo Radyo Laoag ket naibaga na kurang ti masapsapolan na kas DJ iti maysa a bar ditoy ciudad ti Laoag.
Segun met ti asawa ni Guevarra, possible a ti panagsakit ti maysa kadagiti annak da ti makagapu a napanunut ti suspek ti nagtakaw.
Naamoan a dakkel ti panagbabawi ni Guevarra iti inaramid na ngem awanen ti maaramidan na no di ti mangsango ti reklamo a naipila kontra kenkuana.
