LAOAG CITY – Nagbaliktad ti maysa a fortuner iti national highway paset ti Barangay Bangsirit, Bacarra, Ilocos Norte.
Nabigbig ti nangiturong ti Fortuner a ni Joel Aguada, agtawen ti 30, naasawaan ken residente ti Barangay Cadaratan ti nasao nga ili.
Naamoan a kadwa ni Aguada ti balasang na nga agtawen ti uppat idi mapasamak ti insidente.
Segun ken ni Aguada, bayat nga agpapa-amyanan da a direksyon ket dinungpar ti maysa a Kia Carnival nga agpaabagatan met a direksyon.
Gapu ti napasamak ket nadadael ken nabubuong ti sarming ti lugan ni Aguada ngem awan ti nadangran kadagiti maseknan.
Mainaig ti daytoy, inadmitir ti nangiturong ti Kia Carnival a ni Kia Alfredo, agtawen ti 36, maysa a nurse ken residente iti Barangay 28 iti ili a Bacarra a saanna a nakita ti Fortuner a nagresulta ti pannakadungpar na.
