LAOAG CITY – Manamnama a sumango ti kaso dagiti dua a lallaki kalpasan nga intarayan da ti checkpoint ken panagikot ti maysa kadakuada ti paltog idiay Barangay Poblacion 2 iti ili ti Currimao.
Binigbig ni Police Captian Michael Permison, ti chief of police ti PNP-Currimao dagitoy a da Bryan Garcia y Taclibon, 30, naasawaan, maysa a construction worker ken residente iti Brgy. Labut ili ti Badoc ken ni Arnel Saclay y Vergara, 31, awanan ti asawa, para luto ni Mayor Maxi Cajigal ken residente iti Brgy Garreta iti nasao nga ili.
Segun kenni Permison, bayat ti panangiysuwat da ti checkpoint ket sumungad dagiti suspek a nakamotorsiklo ken idi nakita da dagiti pulis ken kellaat a nag-u-turn rason ti pannaka-slide da.
Inbatad na a dagus a bimmangon ti driver a ni Garcia ken pinataray na ti motorsiklo da ken inbati na ti lubbon na a ni Saclay.
Gapo iti daytoy, ginandat ni Saclay a kamaten ni Garcia ngem saan na a nakamatan rason a nagtararay ken dagiti pulis ti nangkamat kenkuana, ken idi asideg dan kenni Saclay ken nakita da nga inbakal na ti ikot na a kalibre 45 a paltog nga addaan ti magazine ken pito a bala a naka-load.
Kabayatan ti hot pursuit operation dagiti otoridad ket nabirukan da ni Garcia a naglemmeng iti maysa a balay iti paset ti Barangay Poblacion 1 iti nasao met laeng nga ili.
Kuna ni Permison a basar ti inisyal nga imbestigasyon da ket naggapo dagiti dua idiay ili ti Badoc ken mapan da idiay ili ti Paoay ken ciudad ti Batac gapo ta adda ti mapan da gatangen.
Mainaig iti daytoy, kuna ni Permison a nakikoordenar da iti PNP-badoc para iti katatao dagiti dua a lallaki.
Malaksid iti daytoy, kuna pay ti hepe nga awan pay ti resulta ti panangberipikar da iti Firearms and Explosive Office no siasinno ti akin-nagan iti nasao a paltog.
Innayon ni Permison nga ammoen da pay laeng no karaman dagiti dua iti gun for hire wenno criminal group.
