LAOAG CITY – Inpetteng ti maysa kadagiti natiliw a maipagarup a peke a doktor a ni Mr. Renie Dantes, 46, tubo idiay Tarlac a siyento porsyento a natalged iti ilaklako na nga Herbal Product.
Daytoy ket kalpasan nga adda dagiti nagreklamo a simmakit iti buksit ken mata da.
Inlawlawag ni Dantes a kalikagum na a maamoan ti resulta ti eksaminasyon no pudno a dagiti agas wenno food supplement iti makaigapu iti panagsakit ti buksit dagiti sumagmamano a residente iti Brgy. Paayas ken Brgy, Ablan iti ili a Burgos.
Inpasingked ni Dantes a saan da met a pilpiliten dagiti tattao a gumatang iti lako da.
Natiliw pay ti kadwa na a ni Rosalinda Gabon, 39, aglaklako pay ti Herbal Product ken taga Tarlac nga agserserbi a paraisurat kadagiti mairekomendar nga agas.
Kabayatanna, kinumpirmaran ni P/Staff Sgt. Jimmy Hufancia, Imbestigador ti PNP Burgos a napasublin iti kwarta nga inbayad dagiti gimmatang ti agas manipod kadagiti dua a maipagarup a peke a doktor a da Renie Dantes ken Rosalinda Gabon nga aglaklako ti herbal product.
Agarup 15, 800 a pisos iti naipasubli a kwarta dagiti 27 dagiti gimmatang manipod iti Barangay Ablan, Paayas, Bayog ken Buduan iti ili a Burgos.
Nupay kasta, kunana nga addaan iti natalged a kasasaad dagiti biktima a nagsakit ti buksit na kalpasan a tinumar da dagiti ginatang da nga agas.
Patien ti opisyal a peke iti PRC ID ti maysa kadagiti dua a maipagarup a maysa daytoy nga Iridologist.
Rumrumuar a naggapo iti Dynapharm a kumpanya dagiti ilaklako da nga agas.
Innayon nga awan inpresentar dagiti dua a permit tapno mangisayangkat ti check up iti nasao a lugar ken saan a naimpormaran dagiti opisyal ti barangay malaksid iti presidente ti senior citizen a nangipakaamo kadagiti maseknan iti nasao nga aktibidad.
Iti agdama, agtultuloy iti imbestigasyon ken panangberipikar dagiti otoridad iti pakabigbigan dagiti dua.
