LAOAG CITY – Inbatad ni Barangay Chairman Elmar Siazon iti Barangay 28 ditoy ciudad ti Laoag a dagiti dua a kabarangayan na a natiliw iti naiyuswat a drug buy-bust operation ket addan ti pannakaibalud da gapu met laeng iti illegal a droga no sadinno a ti maysa ket naggapo iti Bilibid.
Nabigbig dagiti subject iti operasyon nga isuda Joseph Domingo y Llamas, 45, naasawaan, awanan ti trabaho, ken ni Melecio Villegas Jr. y Oblido, agtawen ti 40, awanan ti asawa, agpada dagitoy a residente iti nadakamat a barangay.
Naala iti posisyon ni Domingo ti sangaribo a pisos a nausar iti operasyon, maysa a silulukat a transparent plastic sachet a naglaon ti white residue ken sumagmamano a drug paraphernalia.
Nakumpiskar met dagiti otoridad ken ni Villegas ti dua a heat-sealed transparent plastic sachets a naglaon ti white crystalline substance, maysa a silulukat a transparent plastic sachet a naglaon ti white residue;, maysa a cellphone, personal a kwarta na nga umabot iti Php 482.00 ken ti driver’s license na.
Inpetteng ni Kapitan Siazon nga idi rimuar iti bilibid ni Nemesio ket saanna koma kayaten a mapan agnaed pay iti barangay da gapu ta mamati a sublianan na metlaeng ti illegal nga aktibidad na.
Inpalgak na a no agtultuloy dagiti illegal nga aktibidad dagiti maseknan ket ado dagiti maperdi nga ubbing iti barangay da. Mainaig iti daytoy, kuna ni Siazon a dagiti saan a mangayat a madalusan ti barangay da iti illegal a droga ket saan danton a botosan daytoy iti sumaruno nga eleksyon tapno maaramid latta dagiti maseknan ti kaykayat da.
