LAOAG CITY – Nagtalinaed iti kustudiyar ti PNP-San Nicolas ti agnagan ti Roger Ko y Reoteta, agtawen ti 34, awanan ti asawa, tricycle driver ken residente iti Barangay 1, San Francisco iti nasao nga ili.
Daytoy ket kalpasan ti balligi nga anti drug buy bust operation nga inyuswat ti PNP-San Nicolas babaen ti panangidaulo ni Police Chief Inspector Paul Benedict Parado ken iti koordinasyon da iti PNP-Dingras, PDEA Regional Office 1.
Naala manipud iti suspek ti maysa a plastic sachet a maipagarop a naglaon ti napagango a bulong ti marijuana a nailako na iti nagpammarang a gumatang.
Nakumpiskar pay ti maysa a casapuego a naglaon ti sachet a maatap nga addaan ti napagango a bulong ti marijuana, dua a sachet a maipagarop a naglaon ti shabu, 500 a pisos, maysa nga US dollar, 700 a pisos kwarta na ken ti tricycle a nagluganan da.
Inbatad ni Parado nga idi pay laeng Hulyo a masipsiputan ni Ko gapo iti impormasyon nga agtultuloy ti iligal nga aktibidad na ken dagiti dadduma nga items na ken maipagarop nga aggapo idiay Bulacan ken Manila.
Inlawlawag na a saan a nagturpos ni Co iti CBRP kalpasan a nagsardeng ngem inyenrol da iti RWP a naggradwar ngem arig napilitan laeng a simmuko.
Nagkedked met nga agkomento ni Co seknan iti pannakatiliw na.
