LAOAG CITY – Nagtalinaed iti Gov. Roque Ablan Senior Memorial Hospital ti maysa a lalaki kalpasan a nabagkong babaen ti kaanakan na idiay Barangay Sta. Ana iti ili ti Solsona.
Nabigbig ti biktima a ni Adresito Rafales idinto a ti suspek ket ni Wilfred Gantala, agpada a residente iti nasao a barangay.
Segun kenni Police Senior Inspector Chris Anthony Sorsano, chief of police ti PNP-Solsona, nagriri dagiti dua seknan iti daga.
Inlawlawag ni Sorsano a ginandat ni Gantala a danugen ni Rafales ken linayatan met ti biktima ti suspek ti kutsilyo ngem nalapdan ti maysa a kagawad nga adda iti lugar.
Gapo iti daytoy, inagaw ti suspek ti kutsilyo ken inbagkong na iti biktima a nakasugatan ti akin-kannigid a takyag na.
Kunana a ti kutsilyo ket agatiddog ti 12 inches ken adda iti kustudiyar ti PNP kasta met ti nasao a suspek.
Inbatad na a ti biktima ken suspek ket agpada a nakainom ngem agsabali a lugar ti naginoman da.
Naamoan a dagiti dua ket agnanaed iti maymaysa a balay.
