LAOAG CITY – Manamnama a mapilaan ti reklamo ti maysa a lalaki kalpasan a ginandat na a paltugan ti kayong na iti Barangay 21 ditoy ciudad ti Laoag.
Nabigbig ti suspek a ni Amador Villa Andres, agtawen ti 64 idinto a ti biktima ket ni Reinier Corpuz Luis, agtawen ti 60, agpada dagitoy a residente ti nasao a barangay.
Segun ti report, napan kinomprontar ti suspek ti biktima gapu ti utang ti naud-udi a nagresulta ti panagbinnara da.
Naamoan a nagawid ti suspek ken idi agsubli ket addan ti iggem na a paltog ken pinapatukan na ti biktima ti namindua a daras ngem saan a natamaan.
Iti panagresponde dagiti otoridad ket naala da iti ikot ti suspek ti maysa a kalibre 38 a paltog nga adda dua naka-insert a kapsula ken adda ti uppat a live ammunition na.
