LAOAG CITY – Innala dagiti kameng ti PNP-San Nicolas ti maysa a lalaki gapo iti panag-dirty finger na iti maysa a judge ken arig na umasot ti paltog bayat ti kaadda na iti dakkel a Mall.
Binigbig ni Police Chief Inspector Paul Benedict Parado, chief of police ti PNP-San Nicolas ti lalaki a ni Carlo Daragay y Nero, agtawen ti 23, tubo ti Alaminos City, Pangasinan.
Segun kenni Parado, ti inisyal nga imbestigasyon da ket dumawdawat ti makan kadagiti customers ken ditoy a napasamak ti panag-dirty finger na iti judge ken arig na umasot ti paltog.
Nupay kasta, inbatad ni Parado nga idi kinapkapan da ti lalaki ket awan ti naala da nga anyaman nga ikot na.
Inbatad na nga iti agdama ket agnanaed ni Daragay iti sirok ti gilbert bridge ken aglakalako t rosaryo kadagiti simbaan ditoy ciudad ti Laoag ken ili ti San Nicolas.
Inlawlawag na a basar ti palawag ti lalaki, ti kwarta a paglakwan na ket ipatulod na iti agnagan ti Robert Rakepo.
Mainaig iti daytoy, kuna na nga ikoordinar da iti PNP-Alaminos seknan iti kinatao ti nasao a lalaki.
Kabayatanna, inadmitir niDaragay a nagdirty finger iti maysa a judge bayat nga adda iti uneg ti Mall idiay ili ti San Nicolas ngem saan na nga ammo a maysa a judge.
Segun kenni Daragay, dua a tawen nan ditoy Ilocos Norte ken nakadanon ditoy probinsya babaen ti panagluglugan na kadagiti bus tapno umay aglako ti rosaryo.
Inbatad na a dagiti lako na a rosaryo ket insubli nan iti agtagikua gapo ta saan nan a kabaelan ta amangan ket malugi ken awan ti pagbayad na.
Innaganan na ti pangal-alanan na ti rosaryo a maysa a Jake a taga-Pangasinan met laeng.
Kunana nga umaboten ti innem a bulan nga agwalang-walang ditoy ciudad ti Laoag ken saan na a kayat ti agawid idiay Pangasinan ta narigat ti biag.
Inbatad na a naaramid na ti agdawat iti makan gapo ta naibusan laeng ti kwarta iti dayta a gundaway.
