LAOAG CITY – Natay bayat a maag-agasan iti Governor Roque Ablan Senior Memorial Hospital (GRASMH) ditoy ciudad ti Laoag ti maysa a lalaki kalpasan a nadesgrasya ti inturong na a traysikel iti national highway a paset ti Barangay 5, Pasuquin, Ilocos Norte.
Nabigbig ti biktima a ni Angelito Cariaga y Ukol, agtawen iti 48, naasawaan, mangngalap ken residente met laeng ti nasao a barangay.
Iti imbestigasyon dagiti otoridad, bayat ti panagpapa-amyanan a direksyon ti biktima ket napukawan ti kontrol iti iturturong na a traysikel agingga a natennag iti drainage.
Gapu ti daytoy, nagsagaba ti biktima ti sugsugat iti nagduduma a paset ti bagina kangrunaan na iti ulo na.
Naitaray a dagus ti biktima iti ospital ngem natay bayat a maag-agasan ken nakumpirmaran a nagpositibo daytoy iti Alcoholic Breath (AB) Test.
