LAOAG CITY – Natay ti maysa a lalaki kalpasan a napalto-paltogan babaen ti saan pay nabigbig a suspek iti paset ti Brgy. 23 ditoy ciudad ti Laoag.
Nabigbig daytoy a ni Harold Joy Daquioag, agtawen ti 32, addaan ti live-in partner ken residente ti nasao a lugar.
Segun ti imbestigasyon ti PNP, magmagna a mapan kuma gumatang ti biktima ti ice ken beer iti tianggi idi ta pinalto-paltogan dagiti suspek.
Naitaray iti Governor Roque Ablan Sr. Memorial Hospital ti biktima ngem naideklara a dead on arrival gapo ti sinagaba na a tama ti paltog iti nagduduma a paset ti bagi na kangrunaan na ti ulo.
Nakarekobre met ti 13 a kapsula ti 9MM ken kalibre 40 a paltog kalpasan ti nasao a pammaltog.
Kabayatanna, bayat ti panagturong ti PNP iti pagtaengan ni Daquioag ket adda ti nakita da a maysa a glass tube totter ken lighter iti asideg ti pagtugtugawan ni Marie Angelique Amor Lanot y Guttierez, agtawen ti 27, live-in partner ti biktima ken residente ti Brgy. 28 ngem iti agdama ket agkaskasera iti Brgy. 14 ditoy ciudad.
Gapo iti daytoy, naiwayat ti panagsukimat iti balay ti biktima ket ditoy a nakita da a dua a plastic sachet a naglaon ti maatap a shabu, maysa a dakkel a sachet, empty plastic sachet a mapapati a naggawangan ti maatap a shabu a nakatiliwan ni Lanot.
