LAOAG CITY – Adda iti nasayaat a kondisyon ti maysa a mangisursuro ken guardian ti Day Care Center iti Brgy Nalasin, Solsona, Ilocos Norte kalpasan a nakagat da ti uleg.
Daytoy ti inbatad ni Sang. Bayan Member Nestor dela Cruz, Chairman ti Committee on Education iti nasao nga ili.
Nabigbig dagiti biktima a da Mr. Sonny Dumlao, Day Care Worker ken ti agnagan ti Marites.
Segun ti palawag ni Dela Cruz, bayat nga inlukat ni Dumlao ti tawa ti pagadalan ken inwalin na ti kurtina ket saan na nga ammo a nakabitin ti uleg rason a nakagat ti siko na.
Naamoan a kalpasan ti pasamak ket nakalibas ti uleg ken maipagarop a nagturong iti kusina ngem bayat nga agbirbirok ni Marites ti posporo ket ditoy a nakagat met ti ima na.
Kuna ni Dela Cruz a napalaos ti panagyaman ni Dumlao gapo ta no saan da a nagbirok ti posporo ket saan na a naamoan a nakagat ti uleg.
Gapo iti daytoy, nagpalagip ni Dela Cruz a masapol nga agdalos dagiti umili iti aglawlaw tapno maliklikan ti aniaman nga insidente mainaig ti pannakagat ti uleg kasa met ti lamok.
