LAOAG CITY – Nasugatan ti maysa a negosyante kalpasan a pinaltugan ti saan pay a nabigbig a suspek iti sangwanan a mismo ti kantina ti Mariano Marcos Memorial Hospital and Medical Center idiay ciudad ti Batac.
Nabigbig ti biktima a ni Erwin Dumlao, agtawen ti 51, naasawaan, residente ti Barangay 11 ditoy ciudad ti Laoag.
Naamoan a ti nasao a biktima ti manager ti Mariano Marcos Memorial Hospital and Medical Center Cooperative.
Segun ti imbestigasyon, adda ti biktima iti uneg ti kotse na a nakaparada ti sango ti kantina ti nasao nga ospital idi kellaat lattan a paltu-paltugan ti suspek ngem saan a napurwan.
Inbatad ni Police Supt. Marlon Paiste, chief of police ti ciudad ti Batac a ti biktima ket nagsagaba ti sugat ti barukong ken takyag na.
Naitaray a dagus ti biktima iti nasao nga ospital ngem nakarwar met laeng kalpasan a naagasan dagiti sugat na gapu ta napadamgisan laeng daytoy.
Inpakaammo ti opisyal a segun ti CCTV footage ket agarop tallo laeng a metro ti kaadayo ti suspek manipod ti biktima idi paltugan na daytoy.
Iti agdama, addan ti kitkitaen a motibo dagiti otoridad seknan ti pannakapaltog ni Dumlao ngem nagkedked pay laeng dagiti maseknan a mangipublikar tapno saan a maapektaran ti iyus-uswat da nga imbestigasyon.
