Natay ti maysa nga agtutubo iti Estados Unidos gapu iti cardiac arrest kalpasan a nakipaset iti online challenge a nangitured kenkuana a mangan iti super-hot tortilla chip a naduktalan iti autopsy-na.
Daytoy ket ni Harris Wolobah, agtawen ti 14 manipud Massachusetts ket pimmusay idi Setiembre kalpasan a nakipaset iti makunkuna a “One Chip Challenge” a nakairamanan ti chip nga inaramid ni Paqui nga addaan iti Carolina Reaper ken Naga Viper peppers.
Inkeddeng ti lokal a chief medical examiner a natay ni Harris gapu iti cardiac arrest kalpasan a nangan iti taraon nga addaan iti adu a chili pepper extract a maawagan iti capsaicin basar iti report ti autopsy-na.
Mainaig iti daytoy, rimmuar iti autopsy ti agtutubo a dimmakkel ti puso na daytoy a mabalin a nakaigapuan ti ipapatayna.
Sumagmamano nga aldaw kalpasan ti ipapatayna, inikkat ti Paqui ti produkto a naipakete iti coffin-shaped box nga addaan iti nalabaga a bungo ken namarkaan iti ‘extreme heat’.
Kabayatanna, basar kdagiti report tallo nga agtutubo ti naospital kalpasan a nakipasetda iti online challenge idiay California, ken pito ti nagsakit idiay Minnesota gapu iti isu met laeng a rason.
