LAOAG CITY – Pimmusay ti maysa a lalaki kalpasan a binagko-bagkong na ti bagbagi na iti paset ti Barangay Lydia iti ili ti Marcos.
Ti biktima ket agtawen ti 46, naasawaan ken residente iti nasao a barangay.
Segun kenni Police Senior Master Sergeant Leonardo Battulayan, chief investigator iti PNP-Marcos, nakita ti anak ti biktima a menor de edad nga ibabaot ti ama na ti buneng iti ulo na.
Inlawlawag na nga idi anawaen na ti ama na ket nangala ti kutsilyo ken binagkong na ti bukod na a bagi iti agarop namin-innem a daras.
Gapo iti daytoy, kunana a naki-innagaw ti menor de edad iti kutsilyo nga iggem ti ama na nga isu metten ti rason a nakasugatan ti ima na.
Naitaray iti ospital ti biktima ngem saanen a nakalasat.
Iti naun-uneg nga imbestigasyon dagiti otoridad, naibaga ti asawa ken anak ti biktima nga agsagsagaba ti depresyon gapo ta adda ti gundaway nga agmulmulengleng ken arig na adda ti mangar-arasaas kenkuana a saan a makitkita.
Malaksid iti daytoy, naamoan pay nga adda ti gundaway a panagriri ti biktima ken ti asawa na gapo iti maipagarop a panaginom ti arak.
Agtultuloy met ti imbestigasyon dagiti otoridad iti nasao a pasamak.
