LAOAG CITY – Kinumpirmaran ni Police Lt. Godofredo Ribuyaco, deputy chief of police ti PNP-San Nicolas ti pannakatiliw ti maysa a lalaki nga adda ti ikot na a droga kabayatan ti checkpoint nga inyuswat da iti Barangay 6 idi rabii.
Binigbig ni Ribuyaco ti lalaki a ni John Gilbert Fernandez a residente iti Barangay Lumbad iti ili ti Dingras.
Segun kenni Ribuyaco, iti panangisayangkat da ti checkpoint ket sinada da ni Fernandez ken kitaen da kuma ti lisensya na ken ti papel ti motorsiklo na ngem iti panangala na iti daytoy ket simmurot ti straw a mapapati a maar-aramat nga scope iti droga.
Gapo iti daytoy, nagsuspetsa dagiti kameng ti PNP rason nga inukag da ti bag ni Fernandez ngem inpasigurado na a nakaimatang dagiti opisyales ti barangay ken kameng ti DOJ.
Ditoy a naala da manipud iti bag ni Frenandez dagiti uppat a sachet ti maipagarop a shabu, lima a pidaso a nakalukat a sachet nga addaan ti residue ti iligal a droga, dua a pidaso nga improvised straw scope, maysa nga improvised bulb, maysa a glass tooter, dua a pidaso a lighter ken cellphone.
Basar met iti palawag ni Fernandez kadagiti pulis, naggapo isuna iti ili ti Dingras ken mapan kuma idiay Badoc tapno mapan na ited ti kwarta nga igatang ti gatas para iti anak na.
Naamoan pay nga iti pannakisarita da Ribuyaco ken ni Police Staff Sergeant Jhan Lay Apostol, inadmitir ni Fernandez nga idi laeng kalman ti naudi a panagusar na ti droga ngem inpetteng na a saan a kukua ti maipagarop a shbau no diket kukua ti pagayam na.
Naamoan a ni Fernandez ket maysa a drug surenderee iti ili ti Dingras.
Iti agdama ket adda iti kustudiyar ti PNP-Dingras ti nadakamat nga indibidual.
