LAOAG CITY – Sinaludaran ni Retired Master Sgt. Eleuterio Duatin ti Barangay Puttao iti ili ti Solsona ti tinawen a blood letting activity nga isaysayangkat ti Bombo Radyo Philippines.
Segun ken ni Duatin, agingga a kabaelanna pay laeng nga agidonar nangruna ita a panawen ket umad-adu dagiti agkasapulan ti dara.
Inbatadna a nasken a suportaran dagiti kapada nga aktibidad gapu ta daytoy ti maysa kadagiti makaisalbar ti biag ti maysa a tao nangruna kadagiti ubbing nga agkasapulan unay ti dara.
Inlawlawagna a daytoyen ti maika-siam a daras a nagidonar isuna ti dara babaen iti Dugong Bombo ti Bombo Radyo.
Mainaig iti daytoy, inpakaammo ni Mr. Gerald Andres ti Barangay 19 ditoy siudad ti Laoag a tinawen a makipaspaset kadagiti blood letting activities ti Bombo Radyo gapu iti nagbalin a kapadasan ti pamiliana a naminsan met a nagkasapulan ti dara.
Kabayatanna, ginutigot da Duatin ken Andres dagiti dadduma nga agbalin a bannuar babaen iti panangidonarda ti dara.
