LAOAG CITY – Natay ti maysa nga indibidual kalpasan a nagbekkel daytoy iti uneg ti imanmanihir na a beauty salon.
Nabigbig ti biktima nga agtawen ti 33, awanan asawa, ken residente iti ili ti Banna.
Basar iti inisyal nga imbestigasyon, agala-una iti malem ti Hunyo 16, ket nakita dagiti customer ti biktima iti uneg ti salon na nga awanen ti biagna.
Sakbay iti daytoy ket inbatad dagiti nakawitness, a bayat ti panagoperar ti salon na ket kellaat a pinapanaw na dagiti customer na iti saan a masinunuo a rason.
Kalpasan a pimmanaw dagiti customer na ket insigida nga in-lock ti biktima ti ridaw ti salon.
Apaman a nakita dagiti customer ti biktima ket intaray da iti Rural Health Unit iti ili ti Banna ngem naiyakar daytoy iti Doña Josefa Edralin Marcos District Hospital ngem indeklara ti doktor a nangtaming a dead-on-arrival gapu iti asphyxia secondary to strangulation.
Iti agdama, mannarimaan ti naan-anay nga imbestigasyon ti Philippine National Police iti ili ti Banna seknan iti daytoy.
