LAOAG CITY – Balligi ti anti-illegal drug buy-bust operation nga inwayat dagiti otoridad iti maysa nga indibidual iti paset ti Brgy. 5 Bislak River, iti ili ti Vintar.
Nabigbig ti suspek a ni Roel Barrientos y Manegneg, agtawen tallo pulo ket maysa, mannalon, ken residente iti Barangay Saludares, iti ili ti Dingras.
Nakumpiskar iti suspek ti 11 a heat sealed plastic a naglaon iti maipagarop a shabu a naibungon iti maysa a face towel ken maysa a ribu a pisos.
Naglikudan met iti suspek nga isuna ket aglalako iti maipagarop a shabu, ken inbatadna a nagturong laeng iti Bislak River tapno makipagkita iti maysa a pagayam na.
Iti panaki-innuman ti Bombo Radyo Laoag iti suspek naamuan nga isuna ket karu-ruar na iti uneg ti pagbaludan idi tawen 2022, ngem saan a mainaig iti shabu.
Inbatad pay ti suspek nga am-ammu na ni A.K.A. Kim, maysa met nga indibidual a natiliw idi laeng napalabas a rabii gapu met laeng iti ilegal a droga, no sadinno segun kenkuana ket nakaddua na daytoy idi laeng napalabas a bulan, ngem inpaganetget na a saanna nga ammo nga adda pakainaigan na iti ilegal a droga.
