LAOAG CITY – Maysa nga ili idiay Canada ti addaan ti dakkel a problema iti mapaspasangasangan a municipal election inton Nobiembre, daytoy ket kalpasan nga awan uray maysa kadakuada ti interesado nga agbalin a Mayor.
Iti ili ti Kyle ket masarakan iti Saskatchewan no sadinno a daytoy ket maysa a rural municipality nga addaan ti 413 a residente.
Basar kadagiti opisial iti nasao a lugar, agngudon ti termino ita a tawen ti agdama a Mayor a ni George Williams ngem agpapan iti daytoy a gundaway ket awan ti asinoman kadagiti 413 a residente ti nangipakita ti interes nga agbalin a baro a Mayor.
Inbatad ni Chief Administrative Officer a ni Amber Dashney, namindua a daras dagitoyen a nangiruar ti aplikasion tapno agkiddaw ti nominasion para iti kina-Mayor ngem awan ti nagpailista.
Nupay kasta, no bilang awan ti agpaidasig iti kina-Mayor inton Nobiembre 13, kuna ni Dashney nga agpili ti konseho ti temporario nga agtugaw kas Mayor.
