LAOAG CITY – Maysa nga ili idiay Mexico ti nakagun-od ti world record no sadinno a nakaaramidda ti kadakkelan a keso nga agsukog ti circle.
Kinumpirmaran ti records keeping organization a Guinness World Records a ti munisipalidad ti Reyes Etla ti akin-iggem ti world record title a “World’s Largest String Cheese Ball.”
Daytoy ket kalpasan a nakabukelda ti string cheese ball wenno mas am-ammo iti awag nga Oaxaca Cheese nga addaan ti kadagsen a 1,402.58 pounds wenno 636 kilograms.
Naammoan a tapno maaramid ti higante a cheese ball, nagtitinnulong ti local government ti Reyes Etla ken Oaxaca state government.
Kabayatanna, pinagkakaduada dagiti amin a cheesemaker iti lugarda ken nagusarda ti 2,641 a galon ti gatas tapno mabukel ti kadakkelan a bola ti keso iti intero a lubong.
Basar kadakuada, inaramidda daytoy tapno maitandudo ti culinary tourism iti lugarda.
