LAOAG CITY – Inpeksa ni Mrs. Jen Manzano iti Barangay Puyupuyan iti ili ti Pasuquin ti karirikna na kalpasan ti panangi-quarantine ti barangay iti pamilya na iti laksid a saan na met a nakapulpulapol dagitoy.
Segun kenni Manzano, apaman a nakasangpet ditoy probinsya ken nag-quarantine iti barangay isolation ken saan a nagawid iti pagtaengan da.
Nupay kasta, kunana a saan na a ninamnama nga idi rabii ket naiyakar iti DPWH Isolation Facility gapo ta patien na nga arig na ket saan a kayat dagiti opisyales ti barangay nga iti lugar da lattan ti pagtalinaedan na.
Inlawlawag na a ti dimmanon kenkuana ket nakasarsarita na ti asawa ken dagiti annak na ngem naiget a naglikudan na daytoy.
Inpetteng na a no mapan mangted ti asawa na ti kanen na ket saan da nga agsarsarita gapo ta no alaen na laeng ti maipabalon kenkuana no nakaadayon ti pamilya na.
Gapo iti daytoy, kalikagom ni Mrs. Manzano na a ma-review kuma a nalaing ti CCTV footage gapo ta daytoy leng ti wagas tapno mapaneknekan a saan na a pulos a nakasarsarita ti pamilya na bayat nga adda iti quarantine facility.
Mainaig iti daytoy, nasakit ti nakem ni Mrs. Manzano gapo ta nabarikadaan ti balay da ken idi inpakammo na daytoy iti RHU ket inbaga ti doktor nga awan ti inbilin na a kastoy a banag no diket desisyon a mismo ti barangay.
Kabayatanna, kunana nga idi kalman ket agswab test dagiti kameng ti pamilya na ken maiyur-uray ti resulta daytoy ken no negatibo daytoy ket kalikagom na nga agsungbat ti barangay.
Kabayatanna, inlawlawag ni Barangay Chairman Ronald Peralta iti Barangay Puyupuyan iti ili ti Pasuquin a basar iti inpadanon dagiti tattao nga asideg iti barangay hall a sumsumrek ti asawa ni Mrs. Jen Manzano iti isolation unit a nagtalinaedan na.
Ummuna iti daytoy, kunana a positibo iti antigen ken RT-PCR test ni Mrs. Manzano.
Patien ni Peralta nga awan ti dakes na iti inaramid na gapo ta ti gagem na laeng ket protehiran ti pamilya ni Mrs. Manzano ken para iti kabarangayan na.
Segun kenni Peralta, sakbay a simmangpet iti border ni Manzano ket kinataripnong na dagiti opisyales ken tanod rason nga awan ti kinapudno ti rakurak ti maseknan nga awan ti nakabantay.
Kunana a gapo ta madama a matartarimaan ti barangay hall ket adda da iti sango ken sagdudua ti agbantay.
Inbutaktak pay ni Peralta a naduktalan ti chief tanod nga adda ti gundaway a ginandat ni Manzano ti rumwar iti isolation unit ken nakita dagitoy a nagriri dagiti agasawa.
Inadmitir met ni Peralta nga adda ti liway da gapo a nakastrek ti asawa na ngem patien na nga inrana ti lalaki a mapan iti ayan ti asawa na idi awan ti nakita na a nakabantay.
Nakasagana met ti kapitan a mangirakurak ti naala iti CCTV footage.
