LAOAG CITY – Naipakustodyar iti Philippine National Police (PNP) ti maysa nga ina gapu iti panangkabkabil na iti agtawen ti lima a lalaki a sioman na iti Sitio Maharlika, Barangay 1 ditoy ciudad ti Laoag.
Iti palawag ni Barangay Chief Tanud Allan Ancheta iti Bombo Radyo Laoag, nakaawat ti report manipud kadagiti kakadwa na a tanud nga adda ti napan da insalakan nga ubing ken inkabil da iti barangay hall da kalpasan na ket inyendorsar da daytoy iti PNP.
Daytoy ket kalpasan nga intawag ti maysa a karruba dagiti maseknan a kabkabilen manen ti nasao nga ina ti sioman na.
Gapu iti daytoy, nagturong da iti balay ti babai kadwa da dagiti kameng ti pulisya.
Inbatad ni Ancheta nga adda ti panagkitakit ti nasao a babai a sumurot ngem awanen ti naaramidan na gapu ta adda dagiti kameng ti pulisya.
Kuna pay ni Ancheta nga adda ti sugat iti bakrang ken takyag ti nasao nga ubing nga inag-agasan dagiti konsehal iti barangay da.
Innayon na a basar pay kadagiti karruba dagiti maseknan ket kanayun a kabkabilen ti nasao nga ina ti sioman na no nabartek ti babai.
Kabayatanna, kinumpirmaran ni Police Staff Sergeant Zemor Belardino iti Complaint Desk Officer iti PNP-Laoag a masansan a maireport ti nasao nga ina a tunggal mabartek ket kabkabilen na dagiti annak na.
Nakikoordinar metten ti PNP iti City Social Welfare and Development (CSWD) para iti pannakaipila ti reklamo kontra iti nasao nga ina.
Naamoan a ti saanen a nainaganan nga ina ket aggapo iti ciudad ti Batac ken immuna a napanda nagnaed iti Brgy. 15 ditoy ciudad ti Laoag kalpasan na ket immakar da iti Brgy. 1 ditoy ciudad.
Ginandat ti news team ti Bombo Radyo Laoag nga alaen ti kabibiangan ti nasao nga ina ngem saan nga agsusurot dagiti ibagbaga na.
