LAOAG CITY – Naitaray iti Mariano Marcos Memorial Hospital and Medical Center iti siudad ti Batac ti maysa a lalaki gapu ta nakagat daytoy iti uleg idiay ili ti Dingras.
Basar iti impormasion, nakagat ti indibidual kabayatan a mapan na kitaen iti lulutwenna para iti media noche iti pagtaenganna.
Gapu iti daytoy, obserbaran da ti lalaki para iti naan-anay a pannakataming na ken tapno masalakniban ti biagna.
Malaksid iti daytoy, adda pay ti maysa a lakay iti naiyakar manipud iti Laoag City General Hospital para iti naan-anay a pannakataming na gapu ta ngimmato ti blood pressure-na ken pakairamanan ti maysa pay a lalaki manipud iti ili ti Paoay.
Kabayatanna, agtultuloy ti naiget a panagsagsagana ti Mariano Marcos Memorial Hospital and Medical Center para kadagiti agbalin a biktima ti aniaman nga insidente ita a panagsarabo ti baro a tawen.
