LAOAG CITY – Nasugatan ti muging ti maysa nga inhinyero iti maar-aramid a mall iti paset ti Barangay Nangalisan-B ditoy ciudad ti Laoag kalpasan a tinuktukan ti helmet ti saan pay a nabigbig a suspek.
Iti imbestigasyon ti Philippine National Police, kababbaba iti tricycle ti nasao nga inhinyero kadwa na ti maysa a construction worker iti sango ti carwash iti nadakamat a barangay idi kellaat lattan a tinuktukan ti helmet ti saan pay a nabigbig nga indibidual.
Ti suspek ket nakalugan ti motorsiklo ken adda ti maysa a kadwa na no sadinno a kalpasan a natuktukan na ti helmet ti inhinyero ket pinataray da a dagusen ti nagluganan da.
Basar kadagiti otoridad, aggapo ti inhinyero ken ti kadwa na iti maar-aramid a mall no sadinno a naggiinom da gapu ta agawiden ti maysa a kadwa da idiay Mindanao.
Naamoan a daytoy ti damo nga adda ti nangdangran iti inhinyero ken awan ti ammona a basolna no apay nga inaramid da kenkuana ti kastoy.
Iti agdama ket nagtalinaed iti Laoag City General Hospital ditoy ciudad ti Laoag ti biktima gapu ta dakkel ti sinagaba na a sugat.
Agtultuloy met ti imbestigasyon dagiti otoridad tapno mabigbig ti kinatao ti nasao a suspek.
