LAOAG CITY – Bantayan ti pannagna ti kaso ni Kingdom of Jesus Christ founder Pastor Apollo Quiboloy.
Daytoy ti nagbalin a panawagan ni Caritas Philippines President, Kidapawan Bishop Jose Colin Bagaforo kalpasan a simmuko ni Quiboloy kadagiti otoridad kadwa na dagiti uppat a pada na nga akusado.
Segun iti social action arm ti Catholic Bishops’ Conference of the Philippines (CBCP), awan ti VIP wenno very important person iti linteg isut gapuna a napateg a bantayan ken subaybayan ti umili ti kaso tapno masigurado nga agpannuray ti hustisya para kadagiti biktima ti panagabuso ken panaglabsing ti karbengan ti tao ni Quiboloy.
Inpetteng pay ti Obispo a masapol nga agbalin a patas dagiti otoridad iti panangipatungpal ti linteg no sadinno a masapol a saan nga ipaayan ti naidumduma a pabor ni Quiboloy.
Innayon ti Obispo a kasapulan nga agbalin a naiget dagiti otoridad iti panagipatungpal ti proseso ti liteg ken saan a maaddaan ti aniaman a katulagan iti kampo ni Quiboloy ken dagiti dadduma pay a pada na nga akusado.
Maipalagip a simmuko ni Quiboloy iti Intelligence Service of the Armed Forces of the Philippines (ISAFP) idi Setyembre 8 ita a tawen kalpasan a nangipaay ti 24-hour ultimatum ti Philippine National Police sakbay a serken da dagiti napapateg a pasdek ti Kingdom of Jesus Christ idiay Davao City.
