LAOAG CITY – Kinumpirmaran ni Mayor Alexander Calucag iti Solsona, Ilocos Norte a maysa nga ubing a natay gapu ti sakit a dengue iti Sitio Postor, Barangay Mariquet ti nasao nga ili.
Kuna na nga apaman a naipakaammo na ti napasamak ket dagus a pinagtignay na dagiti maseknan.
Inbatad na a napan da a dagus nangipatungpal ti fogging ken clean-up drive.
Innayon na nga adda dagiti nakita dagiti nagturong ti lugar a klase ti lamok a carrier ti sakit a dengue iti asideg ti balay ti natay nga ubing gapu ti sakit a dengue.
Nupay kasta, inbilin ti mayor ti agtultuloy a panagmonitor dagiti maseknan saan laeng a ti nasao a barangay no di amin a barbarangay ti nasao nga ili.
Mainaig ti daytoy, kinumpirmaran pay ni Calucag a malaksid ti natay gapu ti dengue iti Barangay Mariquet ket adda ti kaso ti dengue iti Barangay Agitap.
Malaksid ti daytoy, kuna ti mayor nga adda pay ti maysa a kailian na a maatap a biktima ti sakit a dengue.
