LAOAG CITY – Natay ti maysa a lalaki idinto a nasugatan ti driver ti motorsiklo kalpasan ti desgrasya a napasamak iti Brgy. Corocor iti ili ti Bacarra.
Segun kenni Police Major Arnel Tabaog, hepe ti PNP Bacarra, dagiti biktima ket da RG Tumbaga, agtawen ti 22, kenni Roel Tumbaga, adda iti umno nga edad, agpada a construction worker ken agpada a residente iti Brgy. Sulvec iti ili ti Pasuquin.
Inlawlawag ni Tabaog a napasamak ti desgrasya bayat ti panagpaamianan a direksiyon ti motorsiklo ken adda ti sarsarunuen na nga SUV.
Kellaat a nagpreno ti SUV idinto a possible a naaklaat ti driver ti motorsiklo rason a napukawan ti kontrol iti manibela ken liniklikan na a madungapar iti likudan ti nasao a lugan.
Nupay kasta, iti panangliklik dagiti nagkalubbon iti motorsiklo ti SUV ket napan da iti bangir a lane ti kalsada ket dita a nadungpar ti nagpaabagatan nga Honda CRV nga inturong ti agnagan ti Chia Calixta ‘Y Visco, agtawen ti 35 ken residente iti Brgy. Poblacion 2 iti ili ti Pasuquin.
Gapu iti pannakadungpar dagiti biktima, naidasay da iti kalsada ken dagus a naitaray ni Roel Tumbaga iti ospital idinto ni RG Tumbaga ket naideklara a died on the spot iti lugar.
Segun kenni Tabaog, nakana a sugat iti ulo ken natukkol ti saka ti sinagaba ti pimmusay a Tumbaga .
Naamuan a naggapu iti pagtrabahoan iti Brgy. Nalbo ditoy siudad ti Laoag ken adda iti impluwensya ti nasanger dagiti agkabsat a biktima.
Innayon ni Major Tabaog nga agarup maysa a bulan paylaeng a naganak ti asawa ti pimmusay a Tumbaga.
