LAOAG CITY – Natay ti maysa a lalaki bayat a maag-agasan iti ospital ken nasugatan dagiti dua a lubbon na kalpasan ti pannakadesgrasya da iti paset ti Barangay 10, San Miguel, Sarrat, Ilocos Norte.
Nabigbig ti natay a ni Mark Joshua Parado y Nonong, agtawen ti 18, ti driver ti motorsiklo idinto a dagiti lubbon nga agpada nga agtawen ti 14, ken residente dagitoy idiay Barangay Lumbad iti ili ti Dingras.
Segun kenni Police Major Marlon Padamada, chief of police ti PNP-Sarrat, maipagarop a nakainom ti driver ti motorsiklo ken naggapo dagitoy iti ili ti San Nicolas.
Inbatad na nga iti imbestigasyon da ket agpadaya a direksyon dagiti biktima ken idi nakadanon da iti kurbaan a paset ti kalsada ket maipagarop a napukawan ti kontrol iti manibela ni Parado ken naidungpar da iti sign board ti DPWH.
Gapo iti daytoy, nagsagaba ti sugat iti nagduduma a paset dagiti biktima a puon met ti nakatayan ni Parado.
